ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ

ຕິດຕາມໂຄງການບູລະນະຢູ່ຫໍພິພິທະພັນແຫ່ງຊາດ ຫລວງພະບາງ

------------------------------------------------

ວັນທີ 21 ທັນວາ 2023 ນີ້ ທ່ານ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ, ທ່ານ ປອ ນາງ ສຸດາພອນ ຄົມທະວົງ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ ແຂວງຫຼວງພະຍາງ ພ້ອມດ້ວຍຄະນະໄດ້ລົງຕິດຕາມຊຸກຍູ້ໂຄງການບູລະນະໂຮງລະຄອນພະລັກ ພະລາມ ແລະການບູລະນະທາງພາຍໃນຫໍພິພິທະພັນແຫ່ງຊາດ ພະລາດສະວັງເກົ່າແຂວງຫຼວງພະບາ. ເພື່ອເປັນການຮອງຮັບປີທ່ອງທ່ຽວລາວ 2024 ທີ່ແຂວງຫຼວງພະບາງ ແລະການສະເຫຼີມສະຫຼອງຫຼວງພະບາງ ເຂົ້າເປັນເມືອງມໍລະດົກໂລກ ຄົບຮອບ 28 ປີ.

ໂຄງການບູລະນະ ຢູ່ຫໍພິພິທະພັນ ແຫ່ງຊາດຫຼວງພະບາງ ຄັ້ງນີ້ ໂດຍແມ່ນກົມແຜນການ ແລະ ການຮ່ວມມື, ກະຊວງ ຖວທ ແລະ ພະແນກ ຖວທ ແຂວງຫຼວງພະບາງ ເປັນຜູ້ຮັບຜິດຊອບໂຄງການໂດຍໄດ້ມີການປັບປຸງ ແລະ ສ້ອມແປງເພດານ ໂຮງລະຄອນພະລັກ-ພະລາມມີໜ້າວຽກຮື້ມ້າງ ແລະ ອະນາໄມ ວຽກສ້ອມແປງຫຼັງຄາ ແລະ ເພດານ (ຕິດຕັ້ງໃໝ່) ໂດຍແມ່ນບໍລິສັດ ຊານົນໄຊ ສຳຫຼວດ, ອອກແບບ ແລະ ກໍ່ສ້າງຄົບວົງຈອນ ຈຳກັດຜູ້ດຽວ ເປັນຜູ້ຮັບເໝົາສ້ອມແປງໃນມູນຄ່າ: 1.000.000.000 ກີບ ( ໜຶ່ງຕື້ກີບ) ໂດຍແມ່ນງົບປະມານປົກະຕິ ພາກ 67 ບ້ວງຂໍເພີ່ມນໍາສະພາ ເພື່ອປັບປຸງໃຫ້ໂຮງລະຄອນພະລັກ-ພະລາມໃຫ້ມີຄວາມສວຍງາມ, ປອດໄພ, ແລະ ອຳນວຍຄວາມສະດວກສະບາຍ, ສາມາດຮອງຮັບ ແລະ ດຶງດູດນັກທ່ອງທ່ຽວໃຫ້ເຂົ້າມາທ່ຽວຊົມການສະແດງສິລະປະ ແລະ ລະຄອນພະລັກ-ພະລາມໃຫ້ນັບມື້ນັບຫຼາຍຂຶ້ນ.

ເພື່ອປົກປັກຮັກສາ ແລະ ສົ່ງເສີມມໍລະດົກດ້ານການສະແດງສິລະປະ ວັດທະນະທຳທີ່ເປັນເອກະລັກ ຂອງຫຼວງພະບາງ ເພື່ອການທ່ອງທ່ຽວໃຫ້ມີຄວາມຍືນຍົງ. ພ້ອມນີ້ກໍ່ໄດ້ລົງກວດກາການກໍ່ສ້າງສ້ອມແປງໂຄງການບູລະນະສ້ອມແປງທາງພາຍໃນຫໍພິພິດທະພັນ ພ້ອມທັງເຂົ້າສັກກະລະບູຊາອົງພະບາງ ພະຄູ່ບ້ານຄູ່ເມືອງຂອງຊາວຫຼວງພະບາງ ທີ່ຫໍພະບາງ, ພ້ອມນີ້ກໍ່ໄດເຂົ້າທ່ຽວຊົມວັດຊຽງທອງ ໄຊຍະໂຣຫະຣາມາທິບໍດີມະຫາວິຫານ ເຊີ່ງເປັນແຫຼ່ງທ່ອງທ່ຽວອັນລືຊື່ຂອງເມືອງມໍລະດົກໂລກ ຫຼວງພະບາງ.

ໂອກາດທີ່ທ່ານ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ ໄດ້ລົງຕິດຕາມ ແລະຊຸກຍູ້ໂຄງການ ຢູ່ຫໍພິພິທະພັນຄັ້ງນີ້ ທ່ານ ກໍໄດ້ໄປຢ້ຽມຊົມແຫຼ່ງທ່ອງທ່ຽວ ວັດຊຽງທອງ ຕື່ມອີກ.

ຂ່າວ: ເພັດສາຄອນ ສີມມະວົງ