ໃນວັນທີ 25-26 ມີນາ 2024, ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມທາມທາບ ຮ່າງກົດໝາຍ ຈຳນວນ 03 ສະບັບ (ໃນຂົງເຂດສະພາແຫ່ງຊາດ) ໂດຍການເປັນປະທານຂອງ ທ່ານ ປອ ລີເບີ ລີບົວປາວ ຄະນະປະຈຳ, ປະທານກຳມາທິການເສດຖະກິດ, ການເງິນ ແລະ ການກວດສອບ ສະພາແຫ່ງຊາດ; ກອງປະຊຸມໄດ້ໃຫ້ກຽດເຂົ້າຮ່ວມໂດຍມີບັນດາທ່ານ ອະດິດການນຳພັກ-ລັດ, ມີທ່ານ ວົງສະຫວັນ ເທບພະຈັນ ປະທານສະພາປະຊາຊົນແຂວງ, ທ່ານ ຄຳມ່ວນ ຊົມສີຫາປັນຍາ ຮອງປະທານ ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ, ມີທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ຕະຫຼອດຮອດສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6, ສະມາຊິກສະພາປະຊາຊົນແຂວງ ແລະ ບັນດາພະແນກການອ້ອມຂ້າງແຂວງທີ່ກ່ຽວຂ້ອງ ໄດ້ໃຫ້ກຽດເຂົ້າຮ່ວມ.

ກອງປະຊຸມດັ່ງກ່າວໄດ້ຮັບຟັງການລາຍງານ, ການປະກອບຄຳຄິດຄຳເຫັນ ຂອງ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຕໍ່ກັບການຄົ້ນຄວ້າ ແລະປັບປຸງ ຮ່າງກົດໝາຍ ຈຳນວນ 03 ສະບັບ ຄື: ຮ່າງກົດໝາຍ ວ່າດ້ວຍການເລືອກຕັ້ງ ສະມາຊິກສະພາແຫ່ງຊາດ ແລະສະມາຊິກສະພາປະຊາຊົນແຂວງ ສະບັບປັບປຸງ ປີ 2024; ຮ່າງກົດໝາຍ ວ່າດ້ວຍສະພາແຫ່ງຊາດ ແລະຮ່າງກົດໝາຍ ວ່າດ້ວຍສະພາປະຊາຊົນຂັ້ນແຂວງ ທີ່ໄດ້ນຳມາພິຈາລະນາຄົ້ນຄວ້າ ເປັນຕົ້ນແມ່ນ: ການປັບປຸງໂຄງສ້າງ, ພາກ, ໝວດ, ບາງມາດຕາ-ບາງເນື້ອໃນໄດ້ເພີ່ມເຂົ້າ ແລະບາງມາດຕາ-ບາງເນື້ອໃນ ໄດ້ຖືກຕັດອອກ ທີ່ເຫັນວ່າບໍ່ຖືກຕ້ອງ, ສອດຄ່ອງ ກັບ ກົດໝາຍ ອື່ນ; ເພື່ອເປັນການປັບປຸງ ບັນດາ ກົດໝາຍ ໃນຂົງເຂດສະພາແຫ່ງຊາດ ໃຫ້ສອດຄ່ອງກັບສະພາບເສດຖະກິດ-ສັງຄົມ ໃນໄລຍະໃໝ່.

ຂ່າວ: ສະພາ