ຂະແໜງຄຸ້ມຄອງທຸລະກິດການທ່ອງທ່ຽວ

ທີ່ຕັ້ງ ແລະ ພາລະບົດບາດ ຂອງຂະແໜງພັດທະນາການທ່ອງທ່ຽວ

    ຂະແຫນງຄຸ້ມຄອງທຸລະກິດການທ່ອງທ່ຽວ ແມ່ນໂຄງປະກອບການຈັດຕັ້ງຫນຶ່ງຂອງພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ດ້ານວິຊາການແມ່ນຂຶ້ນກັບການຊີ້ນໍາ ແລະ ກວດກາ ຂອງກົມຄຸ້ມຄອງທຸລະ ກິດການທ່ອງທ່ຽວ ຂຽນເປັນຕົວອັກສອນຫຍໍ້ ຂຄທທ ຂຽນເປັນຕົວພາສາອັງກິດ “ Tourism Business Management Division " ຂຽນເປັນອັກສອນຫຍໍ້ “ TBMD ” ມີພາລະບົດບາດເປັນເສນາທິການໃຫ້ແກ່ ຫົວຫນ້າ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໃນການຄຸ້ມຄອງຫົວຫນ່ວຍທຸລະກິດການທ່ອງ ທ່ຽວ ພາຍໃນແຂວງຫຼວງພະບາງ ຕາມການແບ່ງຂັ້ນຄຸ້ມຄອງ.

ຂອບເຂດສິດ

1. ຄົ້ນຄວ້າຮ່າງເອກະສານແຈ້ງການ, ຫນັງສືສະເຫນີ ແລະ ເອກະສານຢັ້ງຢືນຕ່າງໆ ເພື່ອນໍາສະເຫນີຂັ້ນເທິງພິຈາລະນາ;

2. ຄົ້ນຄວ້າເອກະສານຂໍອອກໃບອະນຸຍາດ, ຍົກເລີກການເຄື່ອນໄຫວວຽກງານຄຸ້ມຄອງທຸລະກິດການທ່ອງ ທ່ຽວຕໍ່ການຈັດຕັ້ງ, ບຸກຄົນ, ນິຕິບຸກຄົນ ຢູ່ພາຍໃນແຂວງ ຕາມການແບ່ງຂັ້ນຄຸ້ມຄອງ ເພື່ອນໍາສະເຫນີຂັ້ນ ເທິງພິຈາລະນາ;

3. ກວດກາ, ແນະນໍາການຈັດຕັ້ງປະຕິບັດບັນດານິຕິກໍາກ່ຽວກັບວຽກງານຄູ້ມຄອງທຸລະກິດການທ່ອງທ່ຽວໃຫ້ ແກ່ການຈັດຕັ້ງ, ບຸກຄົນ, ນິຕິບຸກຄົນ ຢູ່ພາຍໃນແຂວງ ຕາມການແບ່ງຂັ້ນຄຸ້ມຄອງ;

4. ເຂົ້າຮ່ວມປະຊຸມສະເຫນີ ແລະ ປະກອບຄໍາເຫັນຕໍ່ວຽກງານຄຸ້ມຄອງທຸລະກິດການທ່ອງທ່ຽວຕາມພາລະບົດບາດຂອງຂະແຫນງ;

5. ຈັດກອງປະຊຸມ, ສໍາມະນາ, ຝຶກອົບຮົມ, ແລກປ່ຽນ ແລະ ຖອດຖອນບົດຮຽນກ່ຽວກັບວຽກງານຄຸ້ມຄອງ ທຸລະກິດການທ່ອງທ່ຽວ ກັບພາກສ່ວນທີ່ກ່ຽວຂ້ອງ, ບຸກຄົນອົງການຈັດຕັ້ງສາກົນຢູ່ພາຍໃນ ແລະ ຕ່າງ ປະເທດຕາມການຕົກລົງຂອງຂັ້ນເທິງ;

6. ຄົ້ນຄວ້າສະເຫນີຂັ້ນເທິງພິຈາລະນາແຕ່ງຕັ້ງ, ໂຍກຍ້າຍ, ປົດຕໍາແຫນ່ງ ຫຼື ປະຕິບັດວິໄນຕໍ່ພະນັກງານ-ລັດຖະ ກອນ ທີ່ຢູ່ໃນຄວາມຮັບຜິດຊອບຂອງຕົນ;

7. ຂຶ້ນແຜນງົບປະມານ ເພື່ອຮັບໃຊ້ວຽກງານຄຸ້ມຄອງທຸລະກິດການທ່ອງທ່ຽວ ໃຫ້ມີປະສິດທິຜົນ;

8. ຄົ້ນຄວ້າຮ່າງນິຕິກໍາຕ່າງໆຕາມຄວາມຈໍາເປັນທີ່ພົວພັນເຖິງວຽກ ງານຄຸ້ມຄອງທຸລະກິດການທ່ອງທ່ຽວ ເພື່ອ ນໍາສະເຫນີຂັ້ນເທິງຮັບຮອງ ແລະ ປະກາດໃຊ້;

9. ເຂົ້າຮ່ວມຄົ້ນຄວ້າແກ້ໄຂ, ກວດກາ, ຄຸ້ມຄອງບັນດາຫົວຫນ່ວຍທຸລະກິດການທ່ອງທ່ຽວ ທີ່ພະແນກອະນຸຍາດ;

10. ປະຕິບັດສິດອື່ນໆຕາມການມອບຫມາຍຂອງຂັ້ນເທິງ.

ໜ້າທີ່ 

1. ຄົ້ນຄວ້າ, ເຊື່ອມຊຶມ, ຫັນເອົາແຜນນະໂຍບາຍຂອງພັກ-ລັດຖະບານ, ຂອງກະຊວງກ່ຽວກັບການດໍາເນີນທຸລະກິດການທ່ອງທ່ຽວຕາມລະບຽບ-ກົດຫມາຍການທ່ອງທ່ຽວ;

2. ປະເມີນ, ຢັ້ງຢືນມາດຕະຖານ ແລະ ຈັດລະດັບຂັ້ນປະເພດຂອງທຸລະກິດການທ່ອງທ່ຽວ ຕາມລະບຽບກົດຫມາຍ;

3. ຄົ້ນຄວ້າ, ປະກອບຄໍາເຫັນທາງດ້ານວິຊາການກ່ຽວກັບໂຄງການລົງທຶນພາຍໃນ ແລະ ຕ່າງປະເທດທຸລະກິດການທ່ອງທ່ຽວຕາມລະບຽບກົດຫມາຍ;

4. ຊຸກຍູ້, ຄຸ້ມຄອງ, ຕິດຕາມ, ກວດກາການປະຕິບັດກົດຫມາຍ, ລະບຽບການຕ່າງໆຂອງບັນດາຜູ້ປະກອບ ການທຸລະກິດການທ່ອງທ່ຽວ;

5. ຄົ້ນຄວ້າ, ຮ່າງແຜນຍຸດທະສາດ, ກົດລະບຽບກ່ຽວກັບການຄຸ້ມຄອງທຸລະກິດການທ່ອງທ່ຽວຕາມລະບຽບ ກົດຫມາຍ ແລະ ບັນດານິຕິກໍາຕ່າງໆ;

6. ຊຸກຍູ້ ແລະ ເຜີຍແຜ່ບັນດານິຕິກໍາຕ່າງໆກ່ຽວກັບການຄຸ້ມຄອງທຸລະກິດການທ່ອງທ່ຽວໃຫ້ພາກລັດ ແລະ ພາກທຸລະກິດ;

7. ຄົ້ນຄວ້າເອກະສານການອອກ ແລະ ຕໍ່ໃບອະນຸຍາດດໍາເນີນທຸລະກິດຂອງຜູ້ປະກອບການ ການທ່ອງທ່ຽວ ເພື່ອນໍາສະເຫນີຂັ້ນເທິງ;

8. ຄຸ້ມຄອງ, ຕິດຕາມ, ກວດກາເກັບກໍາຂໍ້ມູນຂອງບັນດາບໍລິສັດທ່ອງທ່ຽວນໍານັກທ່ອງທ່ຽວເຂົ້າ-ອອກປະເທດ;

9. ເກັບກໍາສະຖິຕິການລົງທຶນ, ການອະນຸຍາດດໍາເນີນທຸລະກິດຂອງຫົວຫນ່ວຍທຸລະກິດການທ່ອງທ່ຽວພາຍໃນແຂວງ;

10. ຄົ້ນຄວ້າ, ອະນຸຍາດ, ການໂຈະ, ການຖອນ, ການລົບລ້າງບັດນໍາທ່ຽວຂັ້ນແຂວງໃຫ້ຂັ້ນເທິງພິຈາລະນາ;

11. ປຸກລະດົມ, ຂົນຂວາຍ ແລະ ຊຸກຍູ້ສົ່ງເສີມຫົວຫນ່ວຍທຸລະກິດດ້ານການທ່ອງທ່ຽວ, ສະມາຄົມທຸລະກິດ ການທ່ອງທ່ຽວ, ສະມາຄົມໂຮງແຮມ, ເຮືອນພັກ, ຮ້ານອາຫານ, ຮ້ານບັນເທີງ, ນວດ ແລະ ສະປາ, ກຸ່ມ ພະນັກງານນໍາທ່ຽວ ເຄົາລົບ ແລະ ນັບຖືການຈັດຕັ້ງ ໃນການຈັດຕັ້ງປະຕິບັດລະບຽບກົດຫມາຍ ຢ່າງເຂັ້ມງວດ;

12. ຄົ້ນຄວ້າພິຈາລະນາ ແລະ ສະເຫນີການຍ້ອງຍໍບຸກຄົນ, ນິຕິບຸກຄົນ ແລະ ຫົວຫນ່ວຍທຸລະກິດທີ່ມີຜົນງານດີ ແລະ ປະຕິບັດມາດຕະການຕໍ່ຜູ້ລະເມີດກົດຫມາຍ ແລະ ລະບຽບການທີ່ກ່ຽວຂ້ອງກັບການທ່ອງທ່ຽວໃຫ້ ຂັ້ນເທິງພິຈາລະນາ;

13. ພົວພັນ, ປະສານສົມທົບກັບພະແນກການທີ່ກ່ຽວຂ້ອງເພື່ອສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆກ່ຽວກັບການທ່ອງທ່ຽວ;

14. ສະຫຼຸບ, ສັງລວມ ແລະ ລາຍງານສະພາບການເຄື່ອນໄຫວວຽກງານຮອບດ້ານພ້ອມທັງນໍາເອົາທິດຊີ້ນໍາ ຂອງຂັ້ນເທິງລົງມາເຜີຍແຜ່ຈັດຕັ້ງປະຕິບັດ;

15. ປະຕິບັດຫນ້າທີ່ອື່ນໆຕາມການມອບຫມາຍຂອງຂັ້ນເທິງ.

ໂຄງປະກອບການຈັດຕັ້ງ

ປະກອບມີ 04 ກຸ່ມວຽກ ດັ່ງລຸ່ມນີ້:

1). ກຸ່ມວຽກຄຸ້ມຄອງການລົງທຶນ, ທຸລະກິດບໍລິການທ່ອງທ່ຽວ ແລະ ສະຖານທີ່ທ່ອງທ່ຽວ;

2). ກຸ່ມວຽກງານຄຸ້ມຄອງທຸລະກິດສະຖານທີ່ພັກແຮມ, ມາດຕະຖານການທ່ອງທ່ຽວ, ນວດ ແລະ ສະປາ;

3). ກຸ່ມວຽກງານຄຸ້ມຄອງທຸລະກິດບໍລິການຮ້ານອາຫານ ແລະ ສະຖານທີ່ບັນເທີງ;

4). ກຸ່ມວຽກງານຄຸ້ມຄອງທຸລະກິດບໍລິການ ລົດ ແລະ ເຮືອ ຂົນສົ່ງນັກທ່ອງທ່ຽວ.